د پروان ولایت سلګونه تنو اوسیدونکو د سې شنبې په ورځ د پاکستان پر ضد لاریون وکړ او هغه یې د افغانستان د یواځیني دښمن په توګه یاد کړی دی.
دوی همدا شان د خپلو نومونو د ثبت او د پاکستان په وړاندې د سفر بری د اعلان غوښتنه وکړه.
دوی له ولسمشر کرزي څخه وغوښتل تر څو دوی ته اجازه ورکړي چې له افغان امنیتي ځواکونو سره څنګ په څنګ له پاکستان سره جګړه وکړي.
همداراز نن ۱۰۰۰ تنه افغان معیوبینو د افغان امنیتي ځواکونو څخه د ملاتړ او د پاکستان د کړنو په غبرګون کې د ګوشتې ولسوالۍ ته سفر وکړ.
د هرې ورځې په تيريدو سره په هيواد کې د پاکستاني ضد لاريونونو او غونډو لمن پراخيږي، تراوسه د هيواد په څو ولايتونو کې د افغانستان په پولو کې د پاکستان کړنې غندل شوې دي.
د پروان ولايت اوسيدونکي له پاکستان سره د هيواد د پولو په لور د سفربرۍ د اعلان غوښتونکي دي.
د پروان ولایت یوه اوسیدونکي، قاري عبدالحفیظ وویل :«که چیرې اوس ثبت نام شروع شي، نو زه به لومړی کس وم چې له خپلو امنیتي ځواکونو تر څنګ به له پاکستان سره وجنګیږم.»
د دې ولایت یوه بل اوسیدونکي، ملک عبدالهادي ویلي :«زه ۵۵ کلن یم خو له پاکستان سره د جګړې څخه هیڅ ویره نلرم.»
ظاهرا د پروان ولايت پوليس له پاکستان سره په جګړه کې د ګډون د فرمان د صادريدو په تمه دي.
د پروان ولايت اوسيدونکي هم د پاکستان په وړاندې په غوسه دي، د پروان والي خبرداری ورکوي که له پاکستان سره په جګړه کې د ګډون لپاره نوم ليکنه پيل شي د پروان ولايت اوسيدونکي به په دې کار کې مخکښ وي.
د پروان والي، جنرال عبدالبصیر سالنگي وویل :«که چیرې د نوم لکنې لړی پیل شي نو خلک به لکه څنګه چې له سرو پوځونو سره وجنګیدل د پاکستان سره به هم داسې جګړه پر مخ بوزي.»
له چاريکار ښار څخه کابو شپيته کيلومتره ليرې دلته په کابل ښار کې هم په سلګونه افغان معلولينو د پاکستاني ضد لاريون په ترسره کولو د هيواد له امنيتي ځواکونو څخه خپل ملاتړ اعلان کړ.
بالاخره له پاکستاني ضد لاريونونو وروسته، د دغو معلولينو کاروان ننګرهار ولايت ته ولاړ، ترڅو د هيواد پالنې نښې نړۍ ته وښيي، خو که په ريښتيا له پاکستان سره جګړه پيل شي ايا په دغه ولسي ملاتړ تکيه کيداي شي؟